झम झमैलो ........
रै ग्योंऊँ सड़की जग्वाल,
गौं मि तिमलाखोलि नाल
झम झमैलो ........
कैन नि सूणि धाद म्येरि
कैन बोटि नि मै अंग्वाल।
झम झमैलो .......
दादू साल, सैंतालिस मा
देस अजाद ह्वै छौ मेरो,
कैन नि ल्येइ म्येरि सुद,
क्वी त म्येरा जना बि हेरो।
झम झमैलो .......
रै ग्योंऊँ सड़की जग्वाल।
दादू मिन ये, रौला बिटिन
गाड़यों कु गर्र गराट सूणी,
लब्सांदा नौना ज्वान देखिनि
दानों कु सक सक्याट जाणि।
झम झमैलो .......
रै ग्योंऊँ सड़की जग्वाल।
दादू मि साख, साख्यों बिटिन
बैठ्युं छौ सारा मा तुमारो,
खैंडादि क्वी म्यरा ढयों बि
कुटलि द्वी कचाग मारो।
झम झमैलो .......
रै ग्योंऊँ सड़की जग्वाल।
दादू कु होलु वो भग्यान
सुणलु म्येरि धै जु आज,
बिंगलु जिकुड़ी जु म्येरि
बणलु यीं खैरि कि अवाज।
झम झमैलो .......
रै ग्योंऊँ सड़की जग्वाल।
गौं मि तिमलाखोलि नाल।
गौं मि तिमलाखोलि नाल।
गौं मि तिमलाखोलि नाल।
विजय गौड़
No comments:
Post a Comment