शालिनी , म्येरि शालिनी ....... !!!

शालिनी , ए म्येरि शालिनी,
शालिनी, हाँ म्येरि शालिनी,

खिलखिलांदी, रै हैन्सणी,

य म्येरि साम-सबेर, 
त्वै से महकणी,

शालिनी , म्येरि शालिनी ..........

त्येरि य हैन्सि देखि कि,

बिन बात मि बि हैन्सणु,

सुपन्यलि त्येरि आन्ख्यों न,

बनि बनि का सुपन्या देखणु,

छोड़ी न हैन्सणु ये,

खिलीं रै बुराँस सी,

शालिनी , म्येरि शालिनी .......

त्येरि मुखुड्यो उज्यालु देखि कि,

स्यु जून बि सरमाणु,

पैलि ब्यखुनि ऐ जांदु छौ,

अब राति बि डैर-डैरि आणू,

ये थैं यनि डराणि रै,

जु बौडु ना घाम भी,

शालिनी , म्येरि शालिनी .......

लिख्वार त्वे लेख-लेखि कि,

रसिला गीत च मिसाणु,

गितेर, त्वे देख-देखि कि, 

सिख्युं-लिख्युं, गै नि पाणु,  

तू रूप कि कुण्डी मा ऐ,

फुल्याँ फूलों कि बार सी,

शालिनी , म्येरि शालिनी .......

विजय गौड़ 

कविता संग्रह "रैबार" से 

०६।०६।२०१३

Copyright @ Vijay Gaur  06/06/2013