आज मि तिथैं प्याज दयुन्लू,
भोल तू मिथें वोट दये,
ये देसकि सज-समाल,
फेर म्येरा हथों मा छोडि दये।
सस्तु प्याज अबि छौं दीणू,
सस्तु नाजों बंदोबस्त बि हुणु,
नाज-प्याज खै-खै कि, निचंद ह्वैकि तू स्ये जै,
ये देसकि सज-समाल,
फेर म्येरा हथों मा छोडि दये।
सासु जिन यु कै यालि,
पुन्गड़ी तुमरि मै दये यालि,
कमों बेटा इथ्गा प्याज, जु सासु चुनौ जीति जै,
ये देसकि सज-समाल,
फेर म्येरा हथों मा छोडि दये।
"पुजै" हैंका साल ह्वैलि,
धरयाँ तब तै स्यु प्याज च्वैलि,
दारु-बुग्ठ्या बि ऐ जालु, खै-प्ये वोट दये कि जै,
ये देसकि सज-समाल,
फेर म्येरा हथों मा छोडि दये।
फेर तू ना मै पछयाँणि,
खांण-प्योणे फेर छ्वीं नि लाणि,
हमरि मुखाभेंट फेर, हैंका चुनौ मा होलि भै,
ये देसकि सज-समाल,
फेर म्येरा हथों मा छोडि दये।
Copyright @ Vijay Gaur
२२/०८/२०१३
