"स्वीणु"

बिनसिरि मा अफि अफि, 

य क्व हैंसाणि आज?

य सबेर कनि अपड़ी सी,
छ्वीं लगाणी आज। 

            (१.)

बडुलि सि झणि कु लगाणु, 
आज ईं रतब्याण मा,

चखुलि सि मन थैं उडाणु, 
क्वी त वे असमान मा,
क्वी त वे असमान मा ........ 

अचणचक ये सुख्यां मन यु कनु,
छ्वयों पाणि आज?
बिनसिरि मा अफि-अफि. ..... ....... 

            (२.)

यु कु अजाण हात अयूं च, 
अफ़ि म्यरा हात मा,

कैकि माया य मै लिजाणि, 
वीं जुन्यलि रात मा,
वीं जुन्यलि रात मा. ......... 

होलि कैकि खुद य,
ज्व मै खुद्याणि आज? 

य सबेर कनि अपड़ि सी............ 

            
             (३)
तू छै त लुकणी छै किलै?
नि छै त न्यूतणी छै किलै?

लुकणु-न्यूतणु कब तैं रालु,
यु छुची दिन-रात मा
यु छुची दिन-रात मा....... 

ये जिकुड़ा मा य कनि ,
चुला सी आग भुबराणि आज?

बिनसिरि मा अफि-अफि....... 

विजय गौड़ 

कविता संग्रह: रैबार से 

Copyright @ Vijay Gaur 21/08/2013
Updated: ०४ जनवरी, २०२० 

http://vijaygarhwali.blogspot.in/