प्रीत

 म्येरा गीतों गैकि तू,
गीतों मा रस भरि द्ये।
म्येरि प्रीत निभै कि तू, 
प्रीत अमर-अजर करि द्ये।।

जु भि लिखी मैंन, त्वै सोचि कि लिखि,
जु भि बोलि मैंन, बस त्वैमा हि बोलि,
लिख्युं -ब्वल्युं बिंगी कि तू,
मन सुपन्यळु आज करि द्ये,
म्येरा गीतों गैकि तू ……………… 

ये मन मा बसि जु बि, वे लूछि लीगिन लोग,
हैंसि वुंथै दिईं वेँन, अर आँसु म्येरा जोग,
यि आँसु पोंछि जरा तू,
बैतरणी दुःख कि तरि द्ये,
म्येरा गीतों गैकि तू ……………… 

जात-पात नि देखि कबि मैंन, 
मैं त दिख्ये त्येरो मन,
दुन्या रुसईं यनि मै से,
बोला योन्कु क्य कै मिन यन,
बथ तौंकि नि सूणि कि तू,
म्येरि जीत बणि यिख ऐ,
म्येरि प्रीत निभै कि तू ………………… 

@विजय गौड़ 
११. ५६ राति, 
मॉडेस्टो, कैलिफ़ोर्निया 

आज बड़ा दिनों बाद कुच लिखणो बैठ्युं, विदेस कि धरति मा कुच आखर लिखिनि राति बिंजी रैकि, देखा दि कना लगणान  ……