"पहाड़ों मा बणाग"

"पहाड़ों मा बणाग"

चैत निमडी ग्ये बैसाख ऐ ग्ये,
कैकु दस दून नाज ता कैकु बीस दून हवे ग्ये ,   

   

चला हल्दूखाल जौंला और "सेलेब्रेट" कैरियुंला

ठेका वलों की कन्न बार ऐ ग्ये.

'मदिन' लमिड ग्ये पदानो कुलीन,

और 'पूरण' धैयी लगान्दु रै ग्ये,

धैयी लगे की जब कुछ नि व्है ता,

झांजी थैं बीडी की याद ऐ ग्ये.

सुल्गी बीडी निम्ड़द निम्ड़द 

तैल्या पुनग्दी मा स्याँ चुट्ये दे.

झांजी ता अपणी झांझ मा ही छौ 

और गौन्वलों की सर्या करीं कमयीं फुके ग्ये.

एक चालीस रूप्या की थैली मा,

देखा कनु सर्या पहाड़ फुक्ये ग्ये .

हर मन्खी दिख्येनु लाचार,

'मदिनी-पूरण' तुमारु कनु म्वरी ग्ये,

नि  कन्न पैला तुम 'सेलेब्रेट',

लोलावो तुमुन मनख्यात फूकी दये.

ना देखि सकनो छौं ना छोपी सक्नौ छौं,

सर्या पहाड़ मा कनि बणाग लगी ग्ये...

क्वी ता आवा अग्ने और रोका स्यूं झाज्युं थैं,

जौंकी दारु मा म्येरू पहाड़ फुक्ये ग्ये,

हैरी भैरी डांडी कांठी,

देखा कनि उज्याड़ बणी गयें.

देखा कनि उज्याड़ बणी गयें.....

विजय गौड़ 

१८ जून २०१२ 

सर्वाधिकार सुरक्षित..

"नारैन"

"नारैन"

देखा नारैन कू खून आज जबरदस्ती निकल्येनु च ,

क्या कन्न कलयुग मा यन्नी ता होंद,

इतिहास मा जन कल्याण का वास्ता नारैन  कू अवतार हवे छौ,

आज नारैन कू खून कैकी अस्मिता का वास्ता गढ़ेनु च ,

आखिर कब तक छुपैलू अपना स्यों कुकर्मों की कुंडली,

अब जन मानस अपना अधिकारों थैं समझनो च,

नौनु बुन्नु तू मेरु बुब्बा छै,

और बुब्बा बौग सरनो च,

आखिर कै कै थैं जी जवाब दयोलू नारैन,

झनि कितना लम्बी लैन लगायी च,

बेशर्मी की भी एक हद होंद यनु सुणी छौ,

आज बेशरम ही नारैन बन्युं च..

आखिर कब तक शर्म शार कन्न तिन यु उत्तराखंड,

जैका भोरा तिन स्यु आलिशान जीवन बितयु च..

अगर सचु होलू भगवान् ता त्वैथैन असगार लगन ये उत्तराखंड और सभी उत्तराखंध्यु कू..

जौंकी भोली पछ्याण पर तिन प्रश्नचिन्ह लगायु च...

विजय गौड़ 

२९.०५.२०१२.

सर्वाधिकार सुरक्षित

Public Views:

राजेन्द्र सिंह कुँवर 'फरियादी' 5:06pm May 29 हा हा उम्दा लिखा है आप ने विजय जी क्या करें जब नारैण ही खुद येंस्सा हो ........................कोर्ट ने तो सिर्फ और सिर्फ खून माँगा है, जनता तो उसकी हड्डी चूसने के लिए तैयार है जगमोहन सिंह जयाड़ा जिज्ञासु 5:17pm May 29 क्या बोन्न तब...जब तक बात ढकीं..भलि...भेद खुललु त क्या होलु...सोचा डॉ. अवनीश नौटियाल 5:06pm May 29 हे राम, हे बद्रीविशाल या उत्तराखंड की पैलि घटना छ जू आज यनु ह्वै. उत्तराखंड का लोग अपणु खून राष्ट्रहित, सुरक्षा का खातिर देंदा छन. पर क्या बोन्न, बुढया तिवारी यु क्या करियाली त्वेन....

"उत्तराखंड"

"उत्तराखंड"

  

क्या कभी म्यरा भी दिन आला ??

सी दिन पैली भी गरीबी मा ही कटेनी,

और आज भी कुछ नि बद्ल्ये I

घुंडा पैली भी चिर्याँ ही रैंदा छाँ,

आज भी थ्यगली थैं लारू नि ऐ I

पैली बिराणों का बीच अपुथैं खुज्यांदु छौ,

आज अपणो  मा भी पछ्याण नि रै I

कभी क्वी इना फर्काणु कभी क्वी उना,

फ़र्क्ये की भी कुछ हथ नि ऐ I

कबी यू पी मा छऊ, फिर उत्तराँचल व्है ग्यों,

अब उत्तराखंड व्है की बी क्या व्है I

मी ता तब भी तिरस्कृत ही छौ,

अलग हवे की बी कुछ बक्की नि व्है I

फरक इथगा ऐ ग्ये की पैली बिराना लुटना छयाँ,

अब अपनों मा होड़ मची ग्ये I

मेरी  आज बी वी टक्क लगई चा ,

क्या कभी म्यरा भी दिन आला..???

विजय गौड़ 

२२.०५.२०१२