"इखरी माया"

कुच मि छौं बुनु, कुच तु बि बोल,

मिन अपणा बाँठौ खरोल्यूं च, बक्कि तु खरोल।।

मि त्वै खुज्यांदु रौं, 

तू बुज्यों लुकीं रै,

दिब्तों मनांदु रौं, 

पण य देवि नि दिख्ये,

मिन पुन्गड़ी बयीं च,

अब तिन लगांण जोल,

मिन अपणा बाँठौ खरोल्यूं च......

त्येरि मनसा जगांदु रौं,

तु सुनिंद पुड़ी रै,

माया बिन्गांदु रौं,

तिन बिंगी बि नि बिन्ग्ये,

मिन ज्व छांच छ्वलीं च,

अब तिन सौन्ग्याँण भोल,

मिन अपणा बाँठौ खरोल्यूं च ......

   

त्वै अपणि बथांदु रौं,

तु लाटि बणी रै,

त्वै जना आंदु रौं,

तू छांटि होन्दि ग्ये,

मिन आज त्वैमा बुल्युं च,

तु कब बतैलि, बोल?

मिन अपणा बाँठौ खरोल्यूं च ...... 

विजय गौड़ 

सर्वाधिकार सुरक्षित 

१८/०४/२०१३