"उरख्यलि"

दगिड्यो,

आज सब्यों कु परिचय एक यनि चीज़ से कराणु छौं जु हमरा इतिहास मा बडु महत्व कु स्थान रख्दि छै। आज अवश्य नै समय क नौन्याल बुल ला कि मि क्य बात कनु छौं पण सच यु ई च कि ईं वस्तु कु हम सब्यों क वास्ता बडू योगदान रै। वे समय मा दिख्ये जा त या 'ब्वै' कु हि रूप छै। मै बात कनु छौं  "उरख्यलि" की ज्व कबि हरेक चौकै तिरालि दिखेंदी छै, जैमा रोज नाज कुटेंदु छौ अर वांका पश्चात हम खांदा छाया। आज य कुटणा कि परंपरा विलुप्ति का द्वार पर च, मेरु प्रयास यनु च कि ईं अन्नदाता की कुछ स्मृति बिटोलि की रखूँ। एक कविता हमरा पुरण्यों कि ईं सैन्दाण "उरख्यलि" थैं समर्पित। 

बिसरी ग्याँ तुम जैथैं, मै व़ी नखरयलि छौं,

जरा पछ्याँणा त भुलों मैथै, मै तुमरि हि उरख्यलि छौं। 

तुमरु मेरो साथ साख्यों बिटी च,

ब्वै क हतु कि रुटलि, भैणि राख्यों बिटी च  

तुम भूकन कबि रुयाँ त मि ब्वै बणी ग्यों,

मौस्याँण सि चा रयुं भैर, पण मौस्याँण कबि नि रौं,

मि सुप्पु कि दगड्या अर दीदि गंज्यलिक छौं,

पछ्याँणि तुमुन मैथै, मै तुमरि हि उर्ख्यलि छौं।   

ददि-दाज्यों बारम भुलों बड़ी सज-समाल छै,

धुवै-पुछ्ये कि, रोज कुटे कि होंदि जग्वाल छै,

ब्यो-पगिन्यों बेर मैमु बि रान्दि हल्दयाण छै,

बार-त्योहारों कि वे बगत अहा कनि रस्याँण छै,

पितरों कि सैन्दांण भुलों, मै नाजै औंज्यलि छौं,

पछ्याँणि तुमुन मैथै, मै तुमरि हि उर्ख्यलि छौं।   

अब मुल्कौ रीत-रिवाज सि मि बि हर्चि ग्यों,

नै ज़मानै दौड़-भागम भुलों, मि नि दौड़ी सक्यों,

खेति-पात्यों जब नाज हि क्वी नि बुतणा, 

उरख्यली, जन्दरि फेर कैन सुंगणा?

पाणी जैकु प्योणु नि क्वी आज, मि वा नवलि छौं,

पछ्याँणि तुमुन मैथै, मै तुमरि हि उर्ख्यलि छौं।   

कॉपीराईट @विजय गौड़ २७.०८.२०१३