रैबार!!!

हैन्सि ल्या, 
रव़े-२ कि, बगत नि कटेण हो,

उठि जा, 
स्ये-२ कि, उकाल नि लंगयेंण हो।।

कैका सारा नि रौंण,
नि दिखण कै मुखौंदा,  
हथि-खुटी हिलैल्ये लोला,

स्यीं, ज्वनि का छौंदा।

सोचि ल्या, 
ध्वै-२ कि, आंख्युंन नि खुलेंण हो,

उठि जा, 
स्ये-२ कि, उकाल नि लंगयेंण हो।।

कोसिस कनु रैई,

भाग, अफ़ि धै लगौन्दा,

रोगै दवै खोजा,

जु मरज भगौंण चौंदा 

खाँसी ल्या, 
सै-२ कि, रोग नि ढकेण हो 

हैन्सि ल्या, 
रव़े-२ कि, बगत नि कटेण हो।।

  

मनखि, कर्मों से हि,

छवटु-बडु होंदा, 
अर मनखि वी,

जो मनख्यों काम औंदा,

पूछि ल्या, 
बौगा ह्वै कि, अपड़ू नि बणेण हो,

हैन्सि ल्या, 
रव़े-२ कि, बगत नि कटेण हो।।

अफ़ी अपुकु कमौण म,
सान नि चितौंदा,
कै लचारै, लचारि कू,
मखौल नि उड़ोन्दा,
दये बि दया, 
दान दयेकि सोनू नि खवेण हो,
उठि जा, 
स्ये-२ कि, उकाल नि लंगयेंण हो।।
   
औंण-जौणे कि य रीत,

दुन्या मा चनि रौंदा,

खालि हाथ ऐ जु यिख,

वुख बि खालि जौंदा,

बींगि ल्या, 
गालि दयेकि, नाम नि कमैण हो,

उठि जा, 
स्ये-२ कि, उकाल नि लंगयेंण हो।। 

विजय गौड़ 

१०/०५/२०१३