चलणा छां, त चला!!

बाटु सुनसान भौत च,

चलणा छां, त चला,

दूर असमान भौत च,

हिट सकणा छाँ, त चला।।

मैन्गैं न मनख्यातै कमर तोड़ीं च,

उठि सकणा छाँ, त चला।

म्येरा घौर अबि पुरणि हि मोर-सिंगाड़ी च,

झुकि सकणा छाँ, त चला।। 

सीदा-सच्चों तैं ज़मानु 'लाटू' बुनू च,

यिन बिंगणा छाँ, त चला।

'सप्पन' बणना कि अटगा-अटग हुईं च,

तुम बि अटगणा छां, त चला।।

सुब्न्या भैजि, अज्क्याल चैन से खाणु च,

तुम नि दुखणा, त चला।

म्यारु मुलुक अज्यूँ बि दिबतों कु आणु-जाणु च,

तुमन बि दिखणा, त चला।।

ब्वे मुरण मा बि दारु बंटेणी गौंफुंड अज्क्याल,

तुम नि बँटणा छाँ, त चला।।

दादा बि दारु, भुला बि दारु, गफ्फा बि दारु, झुल्ला बि दारु,

यु तुम नि रटणा छाँ, त चला।। 

विजय गौड़ 

२०।०५।२०१३